Cwsg, y gweithgarwch hanfodol yna y mae ar bawb ei angen. Mae gan Storiel gasgliad hynod ddifyr o wrthrychau sy’n ymwneud â chwsg, nad ydynt i’w gweld efo’i gilydd fel arfer. Bydd yma ddathliad clyd, lliwgar o gwiltiau clytwaith, carthenni traddodiadol, dillad nos, crud, poteli dŵr poeth a hyd yn oed fodel o wely bocs traddodiadol, a wnaed yn y 19eg ganrif. Mae nifer o’r deunyddiau dros gan mlwydd oed, wedi eu gwneud o wlân a lliain a gynhyrchwyd yn lleol.
Fel rhan o'r arddangosfa Hirael 'Pobol Iawn' (Portreadau a Lleisiau Hirael), gwahoddir ymwelwyr i ddigwyddiad arbennig sy'n cynnwys trafodaeth gyda'r artist Pete Jones a'r ffotograffydd Robert Eames. Bydd Pentref Coll Y Glannau yn cynnig cyfle unigryw i ymchwilio'n ddyfnach i'r straeon a'r themâu y tu ôl i'r arddangosfa ac i fyfyrio ar hanes gweledol cyfoethog ardal Hirael.
Mae BLAS, Pontio yn cyflwyno project arbennig sy’n cofnodi cymuned arbennig Hirael gyda chefnogaeth Storiel. Mae Gwion Aled Williams a’r ffotograffydd Iolo Penri wedi bod yn ymweld â Hirael sawl gwaith dros gyfnod o flwyddyn gan gael cipolwg o’r gymuned a’r unigolion sy’n byw yno. Bydd nawr cyfle i weld ffrwyth y gwaith o gofnodi cymuned Hirael mewn arddangosfa arbennig yn Storiel.
